Posted by 通告 on September 08, 1998 at 00:45:56:
唔經唔覺又一年囉…….真係覺得自己有少少浪費左一年既時間,
如果真係要讀書就要比d心機落去…….
又大一歲….諗野又要理智d……………
不過有時又覺得…..做人真係伸苦…….
又要煩呢樣….又要槓o固樣..為乜呢?
就係為o固兩餐?有時自己諗諗o下,真係唔知為乜….
係為左玩?為左讀多d書?為左有飽飯食?為左錢?
一個人總係夜深人靜時會諗埋呢d野……..
我諗我真係要休息o下……
唉……點都好…..希望第日你地見到一個新既我啦!
祝係九月生日既靚仔靚女,日日靚過一日!
(我都唔知自己打乜,請各位多多包涵!)
Posted by 餅 on September 12, 1998 at 01:02:11:
岩岩睇返精華區，竟然見到自己 N 咁耐之前既一篇文。呢篇野，就當係續篇啦，中文
退化了，就用廣東話來寫算了。
最近唔知又做乜，又玩返 IRC，重要玩埋 ICQ，晚晚
唔到兩點都唔訓，搞到日日都成六點半先起到身 (我以前係五點半起身返工的)。以前少來的討論區我又玩埋一份，都唔知自
己好以無聊成咁。既然難得個 Unionway 未係 NT crash，就係度再吹吹水啦。
工作：
N 咁耐之前重煩緊轉唔轉工，最後都轉左呢份工。我都好開心轉左呢份工，家陣有少少想睇下以前間公司點死，呵呵呵！轉工後，玩唔到 IRC 係一大憾事，個死人
firewall 真係麻 Q 煩。
愛情：
仍然一潭死水，臉冇血色，不知所謂。
方向：
冇晒方向，開始有少少今招有酒今招醉既取向。個個 weekend 都做埋勁冇義意既事，唔係劈酒就好似冇野好做咁。Monterey Park 幾間 bar 既老板同睇場都認到我了，連週圍楂車去賣花
個位呀姐，都比我幫襯到熟晒。天呀，我做緊乜呢？Well，唔
埋了，開心未得囉！！！
嘻，如果你睇返我之前果篇文，好大對比呀！人就係咁架啦，
會變架嘛！
多謝收看吹水劇場。
Posted by 遊龍 on August 31, 1998 at 18:23:43:
電台名咀遇襲受傷，人人議論紛紛，傳媒報章更大聲疾呼，要維護言論自由，又
懸紅緝兇又盛，查實名咀被斬，係咪同佢所主持o既節目有冇關都未知，就唔理
三七廿一有理冇理，幾大都要堅持言論自由先，而的士行內o的同業對於大班俾
人劈o左六刀，都各有見解，好似行家亞「石仔」就話：「佢主持節目，有佢講
冇人講，人地想駁佢呢，佢一係就大聲過你，一係就收你線，咁人地谷谷埋埋咪
一鑊買起囉！」另外一位行家亞「華仔」就搭咀話：「咁又唔係咁講喇，好話唔
好聽，你做主持人丫，o的人打電話入o黎講埋o的無厘頭o既o野，你會點做先？香
港地好多人食飽飯冇o野做就鐘意打電話上電台吹水o架啦，仲要大大聲，懶係有
道理果下先玩死，咁唔夠人講咪算囉，有o的仲爆晒粗……」
我聽見佢兩個o向度拗到面紅耳熱，就對佢地講：「唔使講o野喇，石仔，你平時
講o野夠串啦，但硬係唔見有人斬你？」「係囉….唔知點解呢？」「因為你講
o野冇影響力嘛，你講得串o者，但人人都當你傻o既，咁你o既說話又點會辣得慶
人先得o架？」「咁又係，但大班o的說話又好勁嗎？」「大班就梗係唔同啦，佢
被某本國際知名雜誌，選為全港最有影響力廿五人中其中一位，講出o黎o既o野，
梗係有番咁上下份量啦，仲有呀，香港有好多人當佢神咁拜，又話佢係人民喉舌，
監察政府先鋒，咁有咁大堆人捧你場咯，自不然就暢所欲言啦！」「哦，所以我
就唔會俾人斬，大班就因為講o野勁o的，就俾人斬六o野？」石仔若有所悟地回應
我。「咁講幾句o野唔使斬下話？」華仔在替大班不值。「斬你咪斬你囉，吹呀？
邊有道理講o架？呢個世界幾時都係有強權冇公理o架啦！」大家聽完石仔講完呢句
之後都「唉」一聲行開o左咯，不過而家o的行家就好少叫「鄭大班」了，取而代之
就叫o左佢做「鄭大單」。
在此希望 鄭經翰先生 早日康復！
Posted by 遊龍 on August 14, 1998 at 14:41:21:
的士佬手記 之 神女有心
楂的士真係咩人都會遇到，有錢人、窮人、好人、衰人、警察、賊佬、傳教士、
古惑仔、馬伕，各種類型都有，對唔同類型o既人，又要有唔同方式對待，遇到
o的粗聲粗氣o既古惑仔開口問你o野，你又要用佢地o既語氣回應，修女傳教士上
車問你o野，又要陰聲細氣客客氣氣咁答佢地，有時覺得自己好似做 ｓｈｏｗ咁
，楂夜更的士更甚，古惑仔、馬伕、醉酒佬、妓女、舞小姐、白粉佬周不時都會
碰到，就o尋晚之嘛，就俾我遇到個喇………
o尋晚我泊架車o係灣仔洛克道新Ｘ美舞廳門前等客，無意識地四處望望，從後鏡
發現一位妙齡女郎正慢慢行近我架的士，果位小姐身穿白色一件頭吊帶超短迷你
裙，佢一手就拉開車頭左邊車門，一o野就坐o左o向我隔離位，車上充滿晒佢o既
香水味，那位靚女開聲話：「北角健威花園丫！」，「小姐……健威花園丫嘛
……但你隻手唔使放o向我大脾掛？」我口震震地回答。「嘻嘻，做咩喎！唔得
呀？」，「小姐，唔係咁好囉，阻住我轉波呀！」，「轉波？轉咩波呀？係咪呢
個呀？」條女說時一手拉低果條幼幼o既吊帶並露出了大半個胸脯。「嘩！小姐，
你做咩呀？飲醉呀？唔好咁啦你…..」，「司機哥哥楂咩車丫，楂楂呢度啦！」
「小姐……唔該你莊重o的好嗎？」這時我將架車停埋一邊，就停o左o係灣仔碼
頭海旁。「司機哥哥，我好悶呀！去遊車河丫？」，「o下？遊車河？唔好喇掛。」
我真係俾佢o既表現嚇親。「小姐….你一係坐過第二架啦。」，「唔制呀，我係
要搭呢架呀，你係咪想拒載先？」，「唔係，但麻煩你可唔可以坐番去後座丫？」
「唔鐘意呀，嘻嘻…亞司機哥哥呀，你有冇試過 one night stand 呀？」條女
擺到明玩o野，諗諗下見佢手袋又冇，銀包仔又冇個，就咁迷你裙仔一條，都唔知
有冇錢俾o既？「one night stand？唔係掛？你估我係戇豆(狗)先生呀？你有冇
錢俾o架？」，「司機，我…..我真係冇錢俾o架，頭先去開房，俾條Ｘ街偷o左
個手袋，所以……」，「妖！早o的講丫，車你返健威喇，返番去後面坐，唔好
搞咁多o野！」
呢單o野睇怕都要寫番首打油詩紀念下先 —
的士乘客隨時變，
妙齡女郎好曲線，
拉低吊帶露波邊，
神女有心唔俾錢。
Posted by 遊龍 on August 31, 1998 at 18:22:40:
總是認為無論自己身處邊個行業都好，首先要做的或所持o既態度就係要敬
業樂業，家陣市道唔係咁好，我覺得就更加要俾心機去做，但的士呢行就
好奇怪o既，整體o黎講大部份司機都對於楂的士同做便利店一樣，人地鐘意
幫趁就幫趁，唔幫趁的話就算囉，永冇話好似 sales 咁走去拉客，周圍叫
人坐自己車o既，換句話說楂的士真係好講運，有o的望天打卦o既意味，不過
亦都有o的行家真係力爭上游，勤力到不得了，就好似以前o向港澳碼頭咁，
o的九龍過海的士果o的司機，真係無所不用其極，佢地先將架車泊o向路邊，
一見有客埋就問人地係咪過海，如果係過海的話，佢地連拉帶扯地拖個客上
車，叫個客等等，然後又再去拉過，拉得三四個客後先開車，呢o的就係的士
行頭術語o既所謂”間房”，果o的行家咁樣執轉返過海，通常都可以搵到兩舊幾
o既，但而家就冇呢枝歌仔唱咯，自從機場搬o左，港澳碼頭設立過海的士站後
，果o的”勤力”的士佬已經消聲匿跡，繼而代之o既技倆就係兜下路，監粗收人
地多o的錢囉。
早排我o向南風道國際學校車個客，佢話要去銅鑼灣，我就問佢想行香港仔隧
道定上番南風道再落，佢答話隨便，咁我就以最快去到目的地為原則，選行香
港仔隧道，當到目的地時，收費錶上顯示為三十幾蚊，加埋隧道費都係四十蚊
多o的，個客突然間莫明奇妙地說了一句：「咁平？」，「係呀！係咁平o架！」
我故意有少少諷刺佢，但佢回應話：「頭先我又係o係呢度搭車去南風道，唔知
點解會行到八十幾蚊錶。」，「八十幾蚊？唔係掛？」我心知佢受到其中一名
的士敗類呃喇，「係呀！佢仲行o左好耐先到添呀，邊有你咁快呀？」，「你俾
人呃o左喇，佢兜你路囉。」「o下？乜o的人咁o架？，係呢？你可唔可以教我
點樣應付呀？」，「哦？咁你下次有機會遇到o既咪一出聲就話…咁貴？」，
「係？咁o的的士司機通常會點答o架？」，「佢地多數都會話俾開幾多俾幾多
囉！」，「哦….原來係咁….明喇！」，「先生……咁你頭先俾開幾多咯，
咪俾幾多囉。」那乘客與我哈哈大笑起來。
Posted by 遊龍 on May 09, 1998 at 13:38:51:
開工楂住架的士四圍游，游得兩游就要抖抖，停埋一邊睇下報紙，
幾乎係而家市道低迷0既指定動作，打開報紙睇到一段報導如下：
「九歲女童指控遭的士色魔強行拉入的士車廂，載往偏僻處非禮，
雖然該女童不能認出色魔真面目，但幸得機警的十一歲兄長牢記的士
車牌號碼，警方憑此線索將疑犯拘控，涉為的士色魔的職業司機昨在
區域法院被裁定非法禁錮及非禮罪名成立候判。」睇完呢篇報導真你
有種切齒痛恨之慨，再睇埋果幅附圖，見到果位行家 (唉！行家？要
我叫佢做行家都好似有0的俾佢影衰0既感覺。)斯斯文文，西裝一度，
架著眼鏡，成個年青才俊咁，就算我第一眼望落去都起碼都覺得佢唔
似衰人先啦！又真係諗唔到一個外表咁醒目咁斯文0既人，竟然會做出
0的咁禽獸不如0既行為，喂！大佬！人地九歲咋！你仲有冇人性0架？
全行的士佬都俾你累死啦，而家搭的士0既人都已經唔多，你仲攪單咁
0野出0黎，令到呢個行業蒙上污點，使到的乘客或其他人有晒戒心，覺
得0的的士佬，好多都係變態0既，你0的咁0既敗類，你話你該當何罪丫？
好彩個十一歲0既0靚仔記得你條人渣個車牌0者，如果唔係點拉到你個賤
格佬呀？所以我想0係呢度奉勸下大家，搭的士0既時候，真係要一上車就
睇睇擺係車頭附近果個的士司機証，記低個司機名同埋車牌，有起事上0黎
都有得追究嘛，不過話分兩頭，有0的行家個司機証真係好攪笑，自己個名
細到幾乎睇唔到，果張車頭相又係咸豐年0既，你地咁攪法0的客一睇就覺得
你地正派極都有限啦，鬼鬼鼠鼠咁……。
Posted by 遊龍 on April 28, 1998 at 16:21:55:
楂架車0係條街度舞，唔多唔少都會有0的阻滯0既，咩0野阻滯？好似塞車啦，有時紅
綠燈壞啦，示威、遊行、跑馬、踢波封路啦，不過呢0的阻滯都唔需要罰錢0既，如果
車上面有客的話，好話唔好聽，真係唔使做仲有錢收添，但有0的阻滯就要罰錢喇。
邊0的要罰呢？抄牌囉，真係又阻時間又要講耶穌，又要俾錢喇；好多時都係因為自己
唔小心又或者有心違例所以先先賴0野0既！好似有0的行家廿四小時禁區都照上客，咁
俾人捉到都冇話可說啦，呢0的咪有心囉，至於唔小心0既咪好似有0的九龍的士去到半山
堅道咁，又唔睇清楚路牌，唔知0個度係星期一至六，朝七晚七都唔俾的士、私家車、
貨車行，咁樣俾人抄咪唔小心囉！
我真係好耐冇試過俾警察叔叔抄牌喇，唔係話晒命呀，楂0左成十年的士先抄得0個一張違
例泊車，一張超速駕駛，都咪話我冇料到！點解我會咁醒呢？皆因自己平時楂車一眼關七，
又守規矩，咁0個0的鐵血騎警，綠衣黑腳想”差廚”我都冇咁易！不過早幾日我就慘遭滑鐵
蘆喇…….。
諗起當日咁樣衰法都係十分之抵死0架喇！鬼叫強中自有強中手咩！事源於四月廿六日，
嘩….諗起當日0個場大雨，真係尤有餘悸，好似落狗屎咁嘩啦嘩啦咁落過不停，心情都俾
佢攪到壞晒，咁0岩有個客要去炮台山道「富澤花園」，咁我就沿炮台山道上啦，不過炮台
山道係唔可以右轉富澤花園0既，咁我諗住咁大雨差佬都要企埋一邊避下雨掛？即刻周圍望
一望連隨右轉喇，落0左個客之後，心諗都係自己判斷正確，掉頭就開車走啦，點知0係呢個
時候，已經有位警察先生0係度恭候喇，「唔該你熄匙車牌丫，你知唔知0個度係唔准右轉
0架？」，「知….亞 sir 俾次機會丫！」，「咁大雨我都0係度捕你，你話有冇機會丫？」，
「咁…..唔該你快0的抄啦！」我說時有點悻悻然，「得啦…我會！」，「丫！亞 sir 你真
係好0野0既，我轉入0黎0既時候，睇過晒冇人先轉0架啦！你究竟0係邊度走出0黎0架？」，
「冇….我就企0係路口位0個個平台底之嘛，你睇我唔到係因為0個度好黑，我又著住件雨褸0者。」
警察先生抄完我牌，跟住就企返埋去頭先0個個位度喇，我都仲見到佢個樣……冇理由格？點會睇
佢唔到0既？之後0個位警察先生都好似估到我諗乜咁，將件雨褸往面上遮去，只露出一雙眼睛，
我立時若有所悟地喃喃自語：「抵死！原來我今日遇到隱形戰士！」
(0)