Posted by 糟糟 on April 12, 1999 at 11:52:03:
過多重覆的話語，往往成了最難實現的預言
情愛….透過無聲的表情在等待
然後….時間說明了最後的答案
有愛的人，把一輩子鎖在愛恨情結裏，
直到痛徹心扉之後，才了然破繭而出的美麗，
原來…… 幸福是懂得放手後才開始的。
原來…… 愛妳是那麼一件不簡單的事，
所以…… 我懂得放手了。
(0)Posted by 糟糟 on January 08, 1999 at 15:36:44:
亞洲金融風暴搞到香港冇啖好食，股蟹樓蟹一街都係，每個人都勒緊褲頭，使錢
都冇以前咁爽手，的士行業都可算係香港經濟指標了，好景時人人遞手，衰退時
個個伏晌屋企，通街的士車頂燈著住o黎排晒隊，好似澳門夜總會o的女咁，o係
塊大玻璃後面任人揀，香港的士行業去到咁o既境況，好話唔好聽真係慘過做雞
喇。前日晌太古廣場排隊，基本上排隊已經成為呢期o既指定動作，但排隊排到
轉晒彎出晒法院道仲要上埋山，幾乎去到凱悅酒店就認真誇張喇，係咁逐架車慢
慢蠕動，卒之等o左成廿五分鐘先輪到我。「麥當奴道丫唔該。」，「哦！」回
應時已將失望同惶恐不安以及無奈的心情都灌注落個「哦」字度。兩分鐘車程就
到達麥當奴道。「多謝妳十五蚊丫小姐。」，「唔好意思呀司機，你可以等等我
嘛，我拎o的o野上上去轉頭落番o黎，我其實係要去時代廣場的，如果唔方便咁你
可以走先，因為我都可以自己楂車去o既。」，「方便，點會唔方便呀？你慢慢丫
！」該位小姐跟著就走了上樓，我就晌處痴痴地等，心諗都算好彩咯，排成半粒
鐘都叫做整番轉幾廿蚊，如果就咁o係麥當奴道落，執得十五皮真係喊都冇謂，幾
分鐘後果位小姐施施然上番我車並講：「司機唔該晒呀，麻煩你去時代廣場丫。」
，「ＯＫ！收到，係呢小姐點解你自己唔楂車o既？」，「唉！就係見到你地o的司
機大佬好慘囉，排隊排到出法院道，你地呢輪又冇乜生意，咁我咪唔楂車囉，心諗
如果自己楂車出去又要俾停車場費，與其益停車場，不如益你地啦。」，「多謝妳
！」我回應時語氣中帶著三分感激、七分激昂，方發覺原來低迷o者，查實呢個香港
都仲係美好o既！
遊龍 2006年08月10日
Posted by 糟糟 on January 08, 1999 at 15:29:23:
兩個星期前在機場接載了兩名從英國來的遊客，佢地一上車就同我講，佢地會成晚包起我
架車，仲話想我車佢地周圍遊覽下地道的香港，我一聽之下大喜過望，因為呢轉機場出番
去衰晒都有成百幾蚊啦，而且家下仲有跟尾添，諗起都笑到個身有少少震。
「請問你們到那間酒下榻呢？」我”好”有禮貌地問。「隨便你那一間都可以了，但要不超
過五百元為合。」，「哦？不超過五百元？」我聽後不禁一怔。「對啊！你不知那裡有嗎
？那你就載我到銅鑼灣的伊榮閣吧。」，「你們肯定嗎？」，「去吧！我經常都到香港的
。」大約半小時後經西隧到達了上環，那兩位遊客在指指點點，口中說著上次到港時，就
是被其中一間酒家搵笨，雖然我英文不大好，但總算受過九年的免費教育，都可以勉強明
白對方說些甚麼？我對他們說：「那麼一會兒就由我帶路吧？」「好的！但請不要帶我們
到一些酒家了，我們只想品嚐地道而又價錢廉宜的美食。」「你們今次找對了人喇！」我
沾沾自喜地說。「很好，但不要再是那些楊州炒飯加上咕嚕肉了。」從他們的言談間已知
他們是香港的熟客了。到了賓館登記入住後，我便帶領他們先到香港仔吃了一碗魚蛋粉，
跟著就驅車到鴨”月利”洲大街的孖仔記食炒蜆及沙薑鳳爪，然後又到中環蛇王芬吃了碗熱
騰騰的蛇羹，最後就轉到西營盤正街源記吃糖水，吃得他們直豎姆指大聲叫「Good！」。
Posted by 糟糟 on September 19, 1998 at 13:03:38:
今朝在信箱收信的時候….發覺有一餅帶同一封信…
署名 有心人…裏面有首歌…
咁我以為係有心人首歌啦…信裏面叫我留意歌詞….
你已經不懂
怎麼怎麼方可以令我歡笑
其實你不關心
怎麼深消哭泣你都不知曉
你的思想中
怎麼一點都不注重我需要
從前極美麗亦微妙 可惜浪漫溶掉
這一切已變化了
沒法再笑一秒（而我卻忘不了）
期望以一生眼淚
兌換兌換一些歡笑與懂憬
期望以一生眼淚
兌換兌換一些希冀
倦透一雙眼睛 哭泣我已適應
情人無須刻意敘述說明
It's a crying game
It's a crying game
(Just a crying game)
咩歌？咩人咁得閒？咩人要咁做？唉………
Posted by 遊龍 on October 14, 1998 at 18:28:34:
「你地估家洪今次可以同亞Ａｎｎ玩幾耐呢下？」坐在我架的士車頭的一位漂亮
女孩正在說話。「我就覺得呢次佢同亞Ａｎｎ係o黎真o架喇，我好少見家洪咁細
心對一個女仔o架！」坐在我後面的另一位美少女在回應。「我就唔係咁睇好喇，
家洪成日沙沙滾，又經常擺出一副玩世不恭o既態度，邊有女仔鐘意o架？」後座
左邊第三位靚女也開腔了。「請問咁多位靚女，你地想去邊呢？」坐在司機位的
我禁不住也開口問目的地。「我都係咁話喇，家洪份人又爛滾又爛賭，俾著我都
費事騷佢啦。」車頭少女又搭嗲了。「咪係，果個咁o既亞Ａｎｎ仲好似當佢係
寶咁，死纏住家洪唔放，呢o的正式搬石頭砸自己腳喇。」左面美少女又講o野了
。「都唔係丫，家洪真係為o左亞Ａｎｎ改變o左唔少o架喇，而家佢都冇去蒲吧
啦，晚晚響屋企食飯等亞Ａｎｎ電話，生活不知幾健康。」後面果位睇好呢段感
情o既小姐再度回應了。「咳咳！小姐！我想問你地究竟想去邊o者？」，「哦？
我地冇話你聽咩？咁你又係咁一直向前行？點解唔問問我地去邊呢？」，「小姐
，我問o左兩次o架喇，你地係咁掛住講家洪同亞Ａｎｎo的o野，冇留意我問過o者
。」，「係咩？你有冇問過o架？定係你掛住偷聽我地講o野，冇留意我地話去邊
至掛？」，「嘩！ＯＫ啦，你就當我八卦喇，咁你可以話我聽想去邊未丫？」，
「山頂呀！你醒少少啦。」，「係山頂啦嘛，ＯＫ！而家即刻去。」我其實係心
有不甘地答佢地。「咁你快快趣趣啦。」車頭少女又玩我了。「得喇！好快就到
o架喇，你地繼續家洪亞Ａｎｎ啦。」，「嘩！你叫講就講呀？俾你頭先咁樣叉住
晒，而家冇Ｍｏｏｄ咯。」，「妖！～！％！＠＄％＠＆＄」我心裏在不住咆哮。
Posted by 遊龍 on September 23, 1998 at 12:41:19:
以下係一段的士司機同另一位行家o既對話 :-
「亞坤亞坤」，「收到講」，「有境冇境？」，「疏料呀？你呢？」
「而家o向廢柴度浸緊，位置？」，「灣女灣女戴住帽，吉艇博全餐，家陣
獨孤無敵。」，「喂，亞坤而家我有老細上，老細話去嘩鬼。」，「明哥，
荀料啦又執一底喇！」，「執身彩浸唔死。」，「明哥明哥，我都有老細啊，
柯打大餐廳。」，「又話疏料，潛水未？」，「門口門口轉頭傾。」
三分鐘之後……. 「明哥位置？」，「o岩o岩出o左香蕉窿，你呢？」，
「出水芙蓉呀，前面有郊外呀頂住頂住。」，「哈哈，咁你慢慢轆啦，今晚
點半開會見。」如果睇得明以上o既對話，都算係唔簡單兼係內行人喇。
睇唔明的就等我翻譯下啦 : -
「亞坤有冇生意呀？」，「冇呀！好耐先有一單，你又點呀？」，「而家我o向
柴灣排緊隊呀，你而家位置o向邊呀？」，「灣仔呀，ｘ緊旗等過海，而家得我
一架車擺緊o係頭位。」「亞坤我有客喇佢要去華貴啊！」，「明哥你就好啦呢
轉生意又超過一百啦。」，「咁o岩o者，唔使係咁排隊咯真好彩。」，「明哥我
都有客喇，係去紅磡世界殯儀館的。」，「你又話冇客？點呀入海底隧道未呀？」
「我到隧道門口喇，出番o黎先傾啦。」三分鐘之後….. 「明哥你現時o係邊呀？」
，「o岩o岩出o左香港仔隧道你呢？」，「唉，唔好提喇，o岩o岩出海底隧道，就
遇到前面發生交通意外，而家塞住o左o向收費亭出便。」，「呵呵，咁你慢慢塞啦
，今晚一點半消夜時見面先傾啦。」有幾句o既術語都幾有創意o架，好似 :—
戴帽 = ｘ旗，吉艇 = 空車，獨孤無敵 = 得自己一架車排緊，郊外 = 交通意外
係唔係好過癮呢？以後聽到o的司機係度講術語，你都會知幾成喇掛？
ｘ= 出唔到果個字…
Posted by 遊龍 on August 25, 1998 at 16:04:29:
呢輪天口慶，人人心火盛，郁下就嗌交，甚至乎打交添，不過做的士佬就好喇，
開盡部汽車冷氣噴住，涼浸浸的感覺，真係火氣全消啦，可惜…………..
前日有個行家佢個名叫做「華仔」，遇到另外一個同行，發生o左o的小爭執，
咁華仔就同我講o左個以下咁o既故事。「龍哥，你話喇，楂車搵食係咪好勞氣
先？」「點勞氣呀？」「咪就係周不時為o左o的 cut線問題嘈囉，有o的大哥就
特別巴閉o既，cut完你仲要媽叉你。」「華仔，咪忍下囉，你同我成日o向條街
轆都慣晒o架啦！」「唔係呀龍哥，呢次同我嘈果條友特別串o架！」「點串法
呀？」「冇，佢o向大會堂對開果條干諾道中同我因為cut線時有o的誤會掛？
我車頭出o左一截，佢或者係踩緊油殺緊o黎，可能我令佢要收油兼且踩”迫力”
掛？咁佢咪要抽開少少囉，點知佢仲攔住我車頭又指手又劃腳，咁我都唔理佢
喇，咪跟住佢車尾行囉，點知行行下佢突然一腳重”迫”，搞到我差o的炒落佢車
尾度，咁我咪慶囉，想追住佢o黎問個明白啦，點知我抽左佢就抽左，我抽右佢
就抽右，完全係俾佢架車頂住，最後到達夏愨道橋底，我伸個頭出去嗌有冇搞
Ｘ錯呀？點樣楂車o架？」你估條大哥點呀？「點呀？」「佢一行出o黎就係咁
爆粗，跟住一腳伸落我頭”泵把”度，然後跳起身一拳就窩落塊頭玻璃度……」
華仔話佢當時愕一愕然，跟住就見到塊玻璃裂o左一大片。「嘩！唔係掛，咁ｘ
惡？」「我諗佢自己都唔知自己點解咁好力囉！」「後來點呀？」「後來咪報
警求助囉，我地o的星斗市民仲可以點丫？人地又咁好火，又咁惡…….」
「華仔，你呢單o野屬於刑事毀壞喎。」「係呀！人地巴閉嘛，咪留個刑事案底
以供參考囉！」華仔呢單o野我聽完之後就想寫落呢篇手記度，諗o左幾個題目，
1. 怒爆大銀幕 2.相逢自是有緣 3.天口慶心火盛…..不過最後都係用無題啦
o的人都冇喱頭o既，冇啦啦打爆人地大銀幕…..
另外醒多首打油詩先
天氣炎熱好鬼慶，搞到人人心火盛，
少少誤會詐晒型，拳頭玻璃來硬拼，
力度均勻冇得頂，肢離破碎慢慢整，
一聲不響頭擰擰，絕塵而去確機靈，
星斗市民焗報警，刑事毀壞唔使傾，
勞氣惹禍無情情，留下案底正懵炳。