失物待領

Posted by 遊龍 on April 21, 1998 at 17:43:31:

早前我接載過一位乘客，一名祗是垂下頭默不作聲的乘客，滿懷心事似的，
手中拿著一本包裝精緻的日記簿，啡褐色的外皮鑲著閃閃的金邊，該乘客祗
是在上車的一剎那說了一句：「黃竹坑」，之後便繼續沉默起來，我祗有自
顧自的駕車到那目的地，到達了黃竹坑後，那乘客付了錢並遞上那本日記簿
對我說：「它對我已沒有用了，給你吧！」然後那乘客走了……….。
我拿著日記簿時，茫茫然有點不知所措，最後我將車子靠在一旁，並掛出暫
停載客的紙牌，我望著那本日記出神，於是我開始閱讀了那一本外表精緻的
日記……。

『 三月二日 晴

親愛的嘉俊

與你分開不覺月餘，很惦念你，在這段期間你竟可狠心的連
一個電話也不來，我唯一可以做的就祗有等待，我也祗可以在等待的過程中
去回味與你一起走過的日子，你是多麼的瀟灑俊朗，就跟你的名字一樣，你
是多麼的討人歡喜，你令我有個無數的歡樂時刻，畢竟幸福不是必然的，好
運亦不會在我這邊，世事往往就是如此，越難得到的彷彿就會是你的最愛，
容易得到的總易放手，你喜歡 Jenny的時候，有沒有想過我倆已是一對呢？
我知我確實比她不上，但你知道的，我是愛你的我是無條件地愛你的，難道
你會沒有感受？有其他人比我做得更好嗎？有其他人比我更愛你嗎？ Jenny
的出現改變了你，Jenny 的出現也改變了我，我變得比以前更悉心打扮自己
，我變得幾乎與 Jenny 同一個模樣，可惜…..你就是祗喜歡她！可恨….
你就是想忘記我！我不會恨你我一定不會，我更不會恨她，我祗恨我自己！
我祗恨我自己怎麼不是女人………。

依然深愛著你的偉文 』

「妖………！」這是我看完了日記後所隨心而發的一句，就祗有這一句！
跟著你會在黃竹坑陳白沙紀念中學旁的垃圾箱內發現多了一本垃圾。

Posted by 遊龍 on April 13, 1998 at 16:01:09:

的士行業到達目前呢個境況，都可算係冰河時期咯，如果仲有人諗住入行，無疑係自掘
墳墓喇，近排唔知係唔係市道低迷，見到人人都黑口黑面，上得我架的士0既大都係唉
聲歎氣，一唔係就0係度拗數，再唔係呢就係嗌交。我又係好似平時咁望天打卦啦(不過就
比以前望得仲耐)成條街都係人，就係冇人會諗住截的士，見到0的人0的眼神都好似充滿
落寞感，我不期然地諗下自己都兜0左成個鐘都未有客，再望望個倒後鏡，發覺鏡中人個
樣係灰黑色，係完全冇生氣，果對眼同死0左好耐0既魚眼一樣毫無神彩，心諗咁0既日子
點捱呀？咦….？有人遞手！飛一般似的就將架車駛埋去喇，當時我身處洛克道鵝頸橋底
，上車0既係一男一女，男的開口話：「柴灣丫！」我聽到對方講出目的地後，再睇睇個後
鏡竟發現自己雙眼突然充滿神彩，心情隨即輕鬆得很：「柴灣丫嘛？好0既！」係果個時候
那一男一女開始講0野喇，我見又冇乜0野做，咪聽下人地聽咩囉。
男：「你可唔可以唔好咁0者？」，女：「點呀？我係咁0架啦，你今日先識我呀？」
男：「睇戲0者？睇唔到呢套咪睇第套囉？」，女：「我淨係鐘意睇呢套呀！」
男：「我都同你 say sorry 啦，係咪一定要攪到嗌交收場，你至開心丫？」
女：「係呀！邊個叫你唔一早買定飛呀？」男：「咁我要做0野嘛，你又放假又盛都唔去買飛？」
女：「我大把人等住同我睇呢套戲呀！你要我同你買飛？」，男：「你咁講即係話我一定要去
買飛你先睇啦，如果我唔買你就同其他男仔睇啦係嘛？」女：「係！冇錯！」，男：「咁即係話
你大把男朋友啦，少我一個唔少啦？係嘛？」我聽見個男仔咁講當場忍唔住搭句口：「唏！一人
少句啦，相嗌唔好口，睇戲之嘛一陣買飛睇下一場咪得囉。」，女：「0拿！司機唔該你收嗲，冇你
0既事！」，男：「人地都係好心唔想睇見我地嗌交先勸下0者，你使唔使咁呀？」，女：「咩呀？而
家即係同人地同一陣線0黎對付我咁話喎？」男：「咁係你唔0岩嘛！成日發埋0的小姐脾氣。」，女：「
你吹呀？我係咁0架喇！點丫？」跟手仲一巴打埋個男仔度，好彩個男仔捉住0左個女仔隻手，男：「你想
打我？你冇野下話？唔好講咁多喇，我地分手啦，唔使你咁辛苦喇！橫豎你又有咁多男朋友」，女：
「你……Alan唔好呀….我同你玩下咋！」，男：「司機唔該0係最近落得客0既地方落啦！」，
「哦，收到！」咁我就將架車駛落北角碼頭附近停低，車一停定我即刻拉開度門並講：「小姐，仲唔
落車？」果個男仔聽見我咁講即時有反應地附和著：「係呀！仲唔落車？」，我又懶係有反應地對住
個男仔大叫：「give me five！」果個男仔與我雙掌一貼並發出”0拍”的一聲，繼而我倆再大聲地叫了
一聲「Yeah！！！」

Posted by 遊龍 on April 02, 1998 at 13:02:28:

「就算愛沒有不對，倆心相向不去……..」在我那聊備一格的壞鬼汽車音響中，
傳出了梁漢文的歌聲，我很投入地跟隨旋律在哼著，我”手查”的士有個習慣就係我
唔係咁鐘意聽收音機，多數都係聽錄音帶，聽錄音帶0既好處係每首歌都係自己所
喜愛的，而又不受任何廣告、新聞的騷擾，早排可能因為心情唔多好，咁就錄0左餅
帶，都係諗住擺0係架的士度聽，餅帶0的歌大部份都係慢歌、情歌，仲係有0的係
悲情歌添，不過有時覺得好奇怪0既，有0的歌0既歌詞寫到同自己現在身處0既環境
一模一樣咁0既，亦不得不佩服0的填詞人，佢地好似每一種感情生活、感情障礙都
經過晒咁0既，寫到0的詞令人不知不覺間就代入0左0係裏面，認真神奇！
今日生意麻麻地而且心情同早排一樣唔多好，咁就求祈搵個站頭埋去排下隊就算喇，
0係海洋公園排0左成二十分鐘，終於有位小姐上車，「司機，唔該置富花園丫！」
「哦….好呀！….就算愛…沒有不對」我答了一聲之後自顧自地唱起歌來，「咦？
司機係咪梁漢文呀？」，「我唔係梁漢文…倆心相向不去…」我又是答了一句之後
繼續唱住果首歌，點知果位小姐亦都唔講野，跟住就同我一齊唱起上0黎，「wo….wow..
我想妳知道，人不死，情不休….」到後來竟然一人一句合唱起來，由海洋公園到置富
0既路程並不遙遠，五分鐘左右就到，「小姐！多謝….你…」正想話收佢車費的時候
果位小姐就咁講：「司機，我唔想落住呀，可唔可以車我返海洋公園先呀？我地繼續
唱丫！」，「哦…好呀！」，「司機，我好鐘意梁漢文0架！」，「我都係啊！」跟著
又傳來梁漢文的另一首歌，我唱著：「今天我需要的只是愛….」那位少女跟著唱：「
如果想得到宇宙是我不該….」唱下唱下..我覺得我的心情好了一大半啊！之後果位小
姐都唱0左成六七首歌就0係置富花園落車喇，咁我都唔依收費錶上的價錢收佢錢，係咁
意收0左佢五十蚊就算喇，好好彩地即刻有第二個客上車，我又好似頭先咁一路”手查”
住架的士一路唱歌啦，「喂！司機大佬，睇錶加三十丫！」，「咩呀？做咩加三十呀？」
「拍硬檔你唔好唱丫！」，「………….」。

Posted by JoeJoe on January 02, 1998 at 18:22:02:

夜歸、寂寞、回憶、和投宿無門的心
『每一夜，每一個夜晚，每一個華燈初上的晚上，
我出門，我每一次出門的時候，
都以為這次會碰上心裏想要見的那個人……。』
聖誕節、元旦、年末新歲之際，
閃爍在這城市裏的萬家燈火，艷美霓虹，看似繽紛、溫暖，
但隱藏在璀璨華麗燈飾與幻境背後….
不過是一顆顆寂寞的、渴望溫情的黑夜心情；
在這無語、無奈、孤獨、安靜的季節，寒冷卻沒有雪意的國度。
有待著她的出現…能溫暖那些被虛情假意迷惑得體無完膚的人；
寂寞、夜歸的人都有著一顆敏感的心，他們的期望和編織夢想的
能力，正是這人世間最動人的故事泉源，真的，很久沒有見過能令
人感動的文章了…讓每顆投宿無門的心，有著一個歇腳的地方….

她出現了….. 『香港娛樂場』希望你又也有故事讓我們分享！

Posted by 遊龍 on March 26, 1998 at 18:54:13:

前一排拎起張報紙娛樂版睇，發覺有多篇幅係提及某過氣女星聲稱自己係淫媒，
跟住0的咩城市追擊又大披露，0的咩睇真 D 呀又訪問亞邊個邊個，茶餘飯後多
0左唔少話題，咁我就覺得冇話咩淫媒唔淫媒0既，一個願打一個願捱，咁就求
其啦，都係搵食0者，唔使下下玩踢爆0既！不過講開淫媒，前果輪就遇到單咁
0既0野喇，同平時冇乜兩樣又係望天打卦四圍兜，希望叫做執轉好0野咁啦，0係
馬師道就俾兩位男士截住，「司機大佬，喂，有咩好介紹呀？」兩位外表斯文0既
男士，其中一位正操著並不流利兼且有外省口音的廣東話，「介紹？馬呀？三場
七號丫！我自己0既心水0黎0架！」，「唔係馬呀！即係呢想問你邊度有小姐叫
呀？」第二位又係講緊唔鹹唔淡0既廣東話，「哦？你地想搵小姐呀？我唔識帶
路喎，我做 part time 咋！」，「part time？咩叫 part time 呀？」，「即
係兼職囉！……一係你地搭過第二架啦。」，「喂，司機大佬你係咪出0黎撈
0架？邊度有雞叫你會唔知？我地上面惠州0的的士佬就差唔多邊度有邊度平邊
度靚都知啦。」我心中有氣你估做的士佬奉旨要車你去叫雞咩？「好啦，你叫我
帶路就帶啦。」隨即落旗開車跟住過埋海，然後車佢地去砵蘭街，好老實講我自
己就真係唔曉呢下0野喇，不過人人都話砵蘭街多架步多一樓一鳳咁咪下意識車佢
地0黎囉，但又唔知0係邊度停，停0係邊間至0岩，正暗自拗頭，忽然見到一對狗
男女正在攪緊0野﹝真係狗0黎0架，攪乜大家明0架啦！﹞咁我好自然地就停0左
0係果處，然後同兩個客講：「呢度係喇！」拿拿臨收0左佢地錢，兩位男士(淫蟲)
跟住就落車並問：「0的小姐0係邊度呀？邊間呀？」我指指正在0係度攪緊0野0既
狗”也母”………..我跟住就連跑帶逃地”手查”住架的士絕塵而去，祗聽見後面
傳來幾聲「~!#!%@^$#^&^%&」

Posted by 遊龍 on March 26, 1998 at 15:46:21:

做的士佬有時真係好辛苦，一坐上架車度就要搵車租先，跟住要搵埋油渣錢，然
後先到自己袋，仲要受受埋埋乘客0的氣，咁所以有時都要有適當0既時間停一停
抖一抖，好多行家都會久不久就埋的士站頭排下隊，有時唔係話想做多枝旗，而
係想趁機抖抖食番口煙，舒緩下緊張0既情緒，我好多時都會係咁做0架。
今日就0係港外線碼頭排隊喇，排第九車有排都未到我啦，都係整番口煙先，
車內冷氣開放，唯有攪低隻窗散散味啦，有0的客好怕一上車就聞到陣煙味0架，
排排下又差唔多到我頭位，丟0左枝煙攪番起隻窗先；「先生，去邊呀？」，
「大坑道七十號丫唔該！」，「OK！」咦…..？行行下車聞到陣怪味喎仲臭到
死添，心諗呢位先生0的行為認真唔檢點，冇啦啦你放咩屁0者？又係好似頭先咁
攪低隻窗散散味啦，「司機，你做咩攪低隻窗呀？0的風吹到我個頭好痛呀！」
，「冇…..想散散味0者」，「咩呀？你而家即係暗中”吋”我咁話喇下嘛？」，
「嘩！大佬…..我點暗中”吋”你呀？」，「仲話唔係？你攪低隻窗….即係話
我好放屁0者？」，「嘩！大佬，我冇講呀，你自己認0架咋！」，「我真係唔明，
我一上你架車就聞到成陣煙味啦，你又唔好見我攪低隻窗0黎”吋”你？」，「哦..
咁你好品0者！」(好品？好品就唔會咁失禮啦)，「司機哥哥，你呢下擺到明祗許
司機食煙，不准乘客放屁0者？」，「喂，大佬…..好喇好喇，你繼續啦，你放
夠佢啦！」，「啍！咁就差唔多！」，「亞大大佬，咁你有你放屁，我有我抖氣都
得掛？隻窗我就幾大都要攪低0架喇！」，「啍！隨得你啦！」都話0左做的士佬要
受乘客”氣”0架喇！

Posted by 遊龍 on March 30, 1998 at 18:13:27:

的士佬日日0係咁”手查”住架車四圍兜，有時都要有0的娛樂0既，咁晌放假0既時候都會行下
街、睇下戲咁囉，講開睇戲呢輪都冇辦法唔提一提果套「鐵達尼號」喇，直頭係橫掃全球，
並且破晒香港有史以來0既票房記錄，我諗咁樣都可以叫做好冇得頂喇掛！
有一晚收工之後落”華南”宵夜﹝華南為一家茶餐廳位於灣仔譚臣道﹞，同班行家傾開偈，
好自然地就傾到有0的咩娛樂新聞呀、有0的咩戲好睇呀咁，一位行家亞「石仔」就話呢輪果
套「鐵達尼號」真係勢不可當，佢話淨係佢自己都睇0左兩次，故事內容都相當吸引，咁我就
搭口話：「係呀！而家直情有著一股『鐵達尼號』熱潮啦！周圍都見套戲0的海報同相片。」
跟住「石仔」就話佢早兩日0係架車度聽到有人咁樣講喎………

據說自從 Titanic 公影以後，最近小輪公司在船上新加入以下幾項告示

1. 本公司小輪票價低廉，不需以任何賭博型式來贏取船票。
2. 請勿教唆他人學閣下一樣無聊地向海上吐痰及吐口水。
3. 請勿在船頭位置扮瀟洒地飛翔並大聲呼叫。
4. 請勿在船頭位置扮十字架。
5. 請勿在船尾位置穿著整齊晚禮服並酥胸半露的扮跳海。
6. 請勿無緣無故穿上救生衣。
7. 請勿裸露身體躺在長椅上供人繪畫素描。
8. 請留意維港內並無冰山﹝多年前已被梅艷芳劈開﹞。
9. 請勿在船倉內做愛﹝船上其他地方亦不可，請勿捉字蝨﹞。
10. 乘客請勿無故進入機房參觀，本小輪已轉用油渣引擎，並無人手剷媒炭。
11. 船上並無舉辦任何型式嘉年華會，請不用詢問船員。
12. 船上並不提供場地供人演奏。
13. 當船上發生意外時，請勿驚慌，船員不會向任何人開槍，亦不會自殺。
14. 萬一沉船，樓下的乘客都能夠獲准逃生，切勿以長椅撞擊閘門。
15. 請勿將價值連城的鑽石項鍊拋落海中，如情況許可請捐作慈善用途。
16. 請勿以為本公司小輪為鐵達尼號。
17. 請閣下勿以為自己是李安納度迪卡彼奧。
18. 請閣下勿以為自己是琦溫絲妮。