失物待領

Posted by 吃喝玩樂遊戲人生享受至上傻佬呀Ｊａｎ on April 18, 1998 at 20:38:30:

趕 project 趕到死下死下，走去睇下 d 舊 mail，搵到以前由 tcl (前 hki)
轉寄比自己o既一篇由鐘玉嘉執筆o既文章，依家睇番，又有唔同感受。
就等小弟再 post 出黎同大家分享一下丫！ (希望鐘蛇唔好介意 ^_^)

==============================================================================
發信人: jwalker@tclbbs (鍾玉嘉), 信區: love
標 題: 愛真的”冇得解” ?
發信站: Internet BBS (Mon Nov 18 15:21:38 1996)
轉信站: tclbbs (local)

常聽到人說, 愛是沒理由的, 或曰 : 愛, 沒原因可言, 愛, 冇得解…

但小弟總不服氣, 愛, 真的沒理由, 冇得解嗎?

因為, 如果愛真的沒理由, 那便會很可怕, 試想想以下的說話 :

「我昨日不錯是愛你, 但今天不愛你了, 轉了愛她/她, 為什麼?
不為什麼! 愛, 沒原因的!」

「我愛你, 也愛她/他, 沒辦法, 誰叫愛是沒理由的呢?」

「我愛你, 更愛她/他, 但, 我愛死她/他了… 為何我愛這麼多人?
冇得解, 愛不需要原因, 要原因的就不是愛…」

…
…

小弟相信, 愛是一定有原因的, 可能是她/他的某種性格, 可能是她/他的
某種價值觀, 可能是她/他的外貌, 可能是她/他的某種表情, 甚至乎可能
是她/他的某一動作, 更理想的, 可能是她/他的一切… 但, 不可能沒原
因…

小弟認為, 極其量, 只可以說是, 不能找出全部原因, 但, 這可跟完全沒原
因不同…

小弟也不認同 : 有原因, 但說不出來, 只可意會, 不可言傳, 甚至「愛可道,
非常愛」這些說法, 愛一個人, 總可以說得出你愛她/他的什麼吧…

說不出的, 更大可能是, 跟本自己也不知道自己愛她/他的什麼, 這樣, 憑什麼
就知道自己是愛她/他呢? 就憑想像? 還是憑自己患得患失的感覺?

愛, 不錯是感覺主導, 但, 也須要建基於理性的磐石上, 才可以堅實,
才可以抵敵得過雨打風吹, 才可以開花結果..

所以, 別輕言「愛」一字…

勉之!

鍾玉嘉
(Johnnie Walker)

Posted by 石老師 on April 15, 1998 at 18:44:12:

呀！今日幫新城電台寫緊一0的 Ad Lb,會0係逢星期一1100-1200 0既
日月星晨播出。主題係美及女性自尊。忽然好想同大家分享一下。由
於字數限於80字，所以到喉唔到肺，請見諒！各位女士們，你地又有
乜睇法呢？

Ad Lb 1

究竟乜0野係靚呢？係咪有精緻0既輪廓，窈窕0既身材就代表你係靚呢？
其實只要你懂得尊重自己、尊重別人、愛惜自己及身邊週圍0既人同事
，多0的關心社會同熱心公益。你就已經成為一個十全十美0既靚人！

Ad Lb 2

一路以來，女性隨著潮流不斷改造自己，用各種0既方法去漂白自己0既
皮膚、注入矽令胸部變得更豐滿、做手術去抽走身體內的脂肪。其實我
地係咪應該用自己0既個性、思想0黎衡量自己呢？大家為自尊站起來吧！

Ad Lb 3

The Body Shop 始創人 Anita Roddick 0係 Full Voice 呢本書入面提到
『女性所承受0既壓力越來越沉重，因此佢要開始一個思想上的革命，目標
係反對性別歧視，反對注重身材同年齡，佢所用0既武器就係自尊。』

Ad Lb 4

你有冇為自己面上0既皺紋感到煩惱？有冇為自己矮小，略胖0既身型而感
到沮喪同自卑呢？其實呢一切重要嗎？齊來開懷大笑吧！笑係拉面皮0既最
佳方法。而自尊心強就好似笑聲一樣0甘具感染力！

Posted by 愛蓮 on May 05, 1998 at 03:27:09:

眼, 緊緊盯著攝錄機的viewfinder,
聽筒緊緊的蓋著耳朵, 可看到的, 可聽見的,
就只有某某區的幾個候選人,
笑容可掬地向酒樓裡的食客說:
[我們需要你支持, 記得五月二十四日去投票…]
忽然隱約地聽到很微弱的幾聲[必必必],
心想大概是別人的傳呼機在響吧,
於是, 繼續專心拍攝…

直到終於可停下來休息的時候,
拿出放在攝影機袋裡的傳呼機,
一看, 彷然大悟拍攝中途的[必必必]是什麼的一回事…

看著眼前這部一向被我譏為是[十六比九大電視]的
NEC C11型號兩行顯示的中英文傳呼機,
畫面空空如也, 只好苦笑.

一直都沒有換掉這[十六比九],
原因只有一個, 就是捨不得棄掉裡面儲起了的幾十個訊息:
最後的話, 家人的關心叮嚀, 好友的慰問鼓勵, 妹妹得獎的喜訊…

就是捨不得,
即使那些都已早成為了過去式.

半週年的前夕, 傳呼機裡面存留了半年的都被一次過洗掉淨盡,
沒有濃濃的傷感, 只有淡淡的無奈,
也許是天意, 著我真的要重新開始吧?
捨不得? 只有那麼一丁點兒吧~
值得留於心底的都早已記住了,
既是天意, 也就笑笑算了吧.

結果把心一橫, 往傳呼機的門市換一部新的.
選擇機種的時候, 心裡掙扎著應否賣掉這伴了我三年多,
曾牽動我無數感情思緒, 且曾失而復得的[十六比九].
仍記得有一次在計程車上遺失了[十六比九],
後來竟有好心人拾到, 拿到警署去,
不過那又是另一個故事了.

結果, 還是賣掉了.
既然珍惜的內容都被洗掉了,
留著這個空殼也沒有什麼意義了.

好好看了它最後一眼,
腦海竟於一剎那間,
浮現起無數跟它有關的片段;
它令我哭過, 笑過, 苦過, 樂過,
從前可真沒想過,
原來它在我生活裡佔過多麼大的部份,
在我心目中有何等的重要.

三年多, 說長不長, 說短也不短,
如今, 終要道別了.

別了, 我的十六比九~

Posted by 遊龍 on April 17, 1998 at 12:32:58:

『沒必要羨慕別人雙雙對對，和同性朋友一起逛街、購物，也不失為上佳的娛樂
節目。工作方面，只要按原則及進度行事，便能無驚無險。平日看見合適的物品
，不妨先買回家中，在適當的時間贈予家人，本週你會較易疲倦，買賣樓宇未見
幸運。』以上一段文字係我0係一本雜誌上睇到0既星座運程，星座呢樣0野你信就
有，唔信就梗係冇啦，但有時又覺得寫星座運程0既人好掂，寫到模稜兩可0既有之
，寫到九唔搭八0既亦有，有時睇到把幾火，覺得寫成咁俾著我都寫得出啦！
今日為捱義氣替埋早更0個份﹝行內人叫做踩特更﹞，一早就擒上架的士度，晨早
流流諗住都唔會有客0架喇，點不知一駛出路口，就俾個女仔截住，「早晨！司機
唔該過海丫！紅磡火車站丫！」，「過海？哦….」，「小姐咁早就返大陸？」，
「唔係呀，我去粉嶺咋！」，「哦？返工呀？」，「唔係啊，星座話我今日北上會
遇到的心儀0既人喎。」，「0下？咁你點解又會揀粉嶺0既？」，「嘻嘻，因為我
鐘意0個個男仔佢住0係粉嶺嘛。」，「唔怪得啦，係呢你好信星座0架？」，「係
呀！你咩座0架？」，「我雙魚座0架！今日點講呀？」，「雙魚座……哦…本書
話要小心談話，因住你0既言行得罪人而招致損失喎。」，「衰口臭？得罪人？唔會
掛？」冇幾耐架的士穿過0左海底隧道，見到紅磡火車站喇，忽然0個位少女大聲叫
了出來：「死喇！我趕住出門口唔記得帶銀包呀！」，「小姐，唔係掛？唔好玩我
啦。」，「玩你？邊個得閒玩你0者？」，「咁點呀？你有冇錢俾0架？」，「車！
人地唔記得帶銀包0者，有話過冇錢俾咩？」，「咁你突然大聲嗌嘛，點知你個銀包
唔係要0黎裝錢0既0者？」，「的士佬你使唔使咁串呀？信唔信我投訴你丫0拿？」我
心念一轉想起剛才的星座運程……隨即和顏悅色地對0個位少女講：「0騎0騎….
講下笑0者，唔好嬲….嬲親就唔靚0架喇，一陣你仲要去粉嶺嘛！」嘻嘻嘻嘻地我格
硬裝出一副笑面來，唉…….！究竟係為搵食丫？定信星座呀？

Posted by 遊龍 on April 21, 1998 at 17:43:31:

早前我接載過一位乘客，一名祗是垂下頭默不作聲的乘客，滿懷心事似的，
手中拿著一本包裝精緻的日記簿，啡褐色的外皮鑲著閃閃的金邊，該乘客祗
是在上車的一剎那說了一句：「黃竹坑」，之後便繼續沉默起來，我祗有自
顧自的駕車到那目的地，到達了黃竹坑後，那乘客付了錢並遞上那本日記簿
對我說：「它對我已沒有用了，給你吧！」然後那乘客走了……….。
我拿著日記簿時，茫茫然有點不知所措，最後我將車子靠在一旁，並掛出暫
停載客的紙牌，我望著那本日記出神，於是我開始閱讀了那一本外表精緻的
日記……。

『 三月二日 晴

親愛的嘉俊

與你分開不覺月餘，很惦念你，在這段期間你竟可狠心的連
一個電話也不來，我唯一可以做的就祗有等待，我也祗可以在等待的過程中
去回味與你一起走過的日子，你是多麼的瀟灑俊朗，就跟你的名字一樣，你
是多麼的討人歡喜，你令我有個無數的歡樂時刻，畢竟幸福不是必然的，好
運亦不會在我這邊，世事往往就是如此，越難得到的彷彿就會是你的最愛，
容易得到的總易放手，你喜歡 Jenny的時候，有沒有想過我倆已是一對呢？
我知我確實比她不上，但你知道的，我是愛你的我是無條件地愛你的，難道
你會沒有感受？有其他人比我做得更好嗎？有其他人比我更愛你嗎？ Jenny
的出現改變了你，Jenny 的出現也改變了我，我變得比以前更悉心打扮自己
，我變得幾乎與 Jenny 同一個模樣，可惜…..你就是祗喜歡她！可恨….
你就是想忘記我！我不會恨你我一定不會，我更不會恨她，我祗恨我自己！
我祗恨我自己怎麼不是女人………。

依然深愛著你的偉文 』

「妖………！」這是我看完了日記後所隨心而發的一句，就祗有這一句！
跟著你會在黃竹坑陳白沙紀念中學旁的垃圾箱內發現多了一本垃圾。

Posted by 文盲 on April 18, 1998 at 00:42:58:

壹號皇庭？

吃豬腸粉完趕返學的雪碧和水龍頭，見冇車便過馬路。
『喂！睇燈丫，盲架？』馬路少年團張小強在學校門口大叫！
比人話的心情是不好受的，但雪碧和水龍頭不想多事，急急行過便算。
但是站再學校大門的副校長不放過他們說：『點完名去校長室！』
再未點名之前，雪碧、水龍頭、小鳳姐和棋王一起商量。
大家一至肯定不是關於唔睇燈過馬路。
最後棋王說：『總之左手手指公向上，我地就話係啦，夾就得架啦！』
點完名後，水龍頭和雪碧便各自由班房步向壹號房–校長室。

一進去，校長和副校長己經坐好了。
跳皮的雪碧更水龍頭耳邊說了一聲：『Court!』
校長示意雪碧和水龍頭在一旁的椅坐下。
『登登登…登！』雪碧再在水龍頭耳邊輕叫。
在門口準備進來的原來是……張小強和倪君傑。
校長示意張小強和倪君傑在另一旁的椅坐下。
副校長終於開口：『今朝張小強和倪君傑對我說你們昨天下午冇返學，
因為丁天雪生日，李星龍和丁天雪去了動植物公園慶祝！丁天雪，係唔係丫？』
雪碧說：『昨天係我生日，下唔我和李星龍同學都冇返學，
但係我地冇去動植物公園慶祝，我地只去了睇醫生。』
校長相信雪碧，開始質問張小強和倪君傑：『你地又點知佢地去了動植物公園？』
『我和倪君傑在巴士上聽到丁天雪講既！』張小強說。
『我講過咩丫？』雪碧問。
『你又話老虎丫、羊丫、孔雀丫、馬騮丫、鶴丫，總之你地去過動植物公園。』張小強說。
『你話我地就去過就有去過架啦？』水龍頭問。
『你地仲成身動物園味！』張小強說。
『甘我地個身係有老虎味丫、羊味丫、孔雀味丫、馬騮味丫定鶴味丫！動植物公園味？』水龍頭問。
『甘你地做咩講老虎丫、羊丫、孔雀丫、馬騮丫、鶴丫？』副校長問。
『老虎丫、羊丫、孔雀丫、馬騮丫、鶴丫可以係老師或者同學！』雪碧先看一看副校長，再望一望張小強和倪君傑。
水龍頭見雪碧說得過份，補說：『亦都可以係家人、朋友、寵物、裝飾品甚至係文具既公仔！』
『你地真係去左睇醫生？』校長問。
『我地同左我地班主任講過，我地真係去左睇醫生！』雪碧說。
『甘冇事喇，你地去上堂啦！李星龍，下星期水運會，你補左名未？』校長對水龍頭和雪碧說。
『補左喇，我地走先喇校長、副校長。』水龍頭一邊說一邊離開壹號房，雪碧亦笑住走了。
水龍頭和雪碧笑著離開，雪碧再跳皮地說：『冇罪釋放！』
水龍頭一入到班房，見飛貓竟然在他的班房，他更不知用了甚麼法子，搶了兒歌馨旁邊的位置。
水龍頭一坐底，飛貓便說：『我轉黎呢班讀，我稔我都係讀唔點文科。』
『開左學成個星期，你仲未買書咩？』水龍頭問。
『未丫…』飛貓仲有野想講，但係坐佢後面等了好耐的棋王問：『校長搵你咩事？』
『下堂係實驗室先講，女殺手超住！』大家又開始食麥記早餐同食粥。

小息後果堂係化學，個實驗室鬼死甘長，水龍頭、棋王、兒歌馨、飛貓、小鬼和邪童霸了最後一張檯。
一張冇咩人可以望到的檯，水龍頭便不斷講剛才在壹號房發生既事。
講完了，大家便不斷提意點玩張小強和倪君傑，鬼主意的念頭不斷湧現直到食下唔飯。

在流亦思吃飯時，大家便斷討論壹號房事件。
經過昨日去了動物園，水龍頭留意雪碧多了。
水龍頭立即發覺雪碧在大家面前的冷，和在他兩個人時的跳皮是差好遠。
在飛貓的滔滔講述之下，人人都聽到笑晒口，只有雪碧在默默飲湯。
經過這飯後，除了水龍頭發現多一讓野外，大家都一至通過玩張小強和倪君傑。

食完飯後，便回學校，在學校大門有見張小強和倪君傑。
兒歌馨渺視地說：『門口狗！』
『唔好甘講丫，等陣人地又話我地去晒動物園喇！』飛貓說。
『你未好鍾意汪汪狗既，你就好啦，日日都有得玩！』宙斯對風鈴說。
『咦！著制服既，唔玩丫！』風鈴笑說。
『小鬼丫，我驚狗……唔係，我驚汪汪0架！』邪童散嬌地說。
『唔驚唔驚，佢地冇牙0架，靜係識得對佢主人擺尾！』小鬼說。
『邊個係佢地主人丫？』小雲終於唔明喇，但係佢問雷公！
『你問副校長啦，我乜都唔知0架！』雷公平時唔聲唔聲，佢居然明晒！
這時校鐘嚮，不時上堂鐘，而是集會鐘。
集會上其實冇咩講，但係各學生將會好多野做同好多野玩。
校長要各大小會社在水運會之後，開始正常運作。
這使很多學生在水運會前不停開會，各會都要安排職位，安排一年的活動。
結果係：水龍頭係旅行會長，佢同小鳳姐亦係體育社領隊、
兒歌馨係音樂學會會長、風鈴係排球隊隊長、棋王係棋藝學會會長。
宙思本來只係以上會社物資，但係因為佢好人，被選為學生會副主席。
小鬼同邪童深資童軍正副主席，小鬼更是制服及紀律聯會主席。
小雲年紀少少己是俏護士會既副主席。
小鬼係擊敗倪君傑獲得制服及紀律聯會主席，而倪君傑和張小強係馬路小年團正副主席。
但雪碧就放棄晒所有職位，原因係私人理由！

水運會的早上，大家一如其他大日子一樣在洪七公酒樓飲早茶。
飲完早茶後，便去搭小巴。
竟然有小巴寫住『校車』，水龍頭好心地告訴他今天是水運會。
小巴司機見他們十二人（水龍頭、小鳳姐、棋王、雪碧、兒歌馨、飛貓、
雷公、小鬼、邪童、風鈴、宙斯和小雲），便話每位收少街外一蚊，不停站送他們去。
『今次水運會玩咩丫？』風鈴問。
『棋王，叫左你稔果0禾！』兒歌馨問。
『今日又玩食飯啦！』飛貓說。
『有獎拎既一定要請啦！』小鬼說。
『更係啦！』邪童和意。
『雷公先生，今次我地呢班參加水運會的人得水龍頭、小鳳姐同你，
而你係最冇機會拎獎果個，你有冇壓力呢？』小雲扮記者問。
『我既目標係參與，獎？有未要囉！』雷公說。
『我地十二人，六個比錢啦。』小鳳姐說。
『我地每人將所有錢拿出，剩下三個十蚊銀。
遊戲內容是將呢三個十蚊銀，唔理用咩辦法，變晒一毫子銀。
呢三十蚊包埋今朝既飲食！有最多一毫子為勝，有權選去邊食！
最小一毫子果六個請食飯啦！有獎拎果幾個一定要請啦！』棋王說完，望住水龍頭。
『好啦，就甘決定！』水龍頭說完，小巴己經送到他們去到維記泳池門口。

各班點完名後便開始入泳池，水龍頭和小鳳姐很快便換完衫，在池邊做熱身。
兩人的衣著十分搶鏡，泳衣褲加黃色長風褸。
（這間學校分紅、黃、藍三社，三社的比賽有水運會、陸運會、
各類球類比賽……而呢十二人都係黃社的。）
呢兩隻芒果一剝皮之後，引來一陣叫聲，
原因係兩人的泳衣也十分特出，男既幼邊，女既更利害，著了三件小布一件頭泳衣。
由於三件泳衣露既地方不同，所以重疊之後不算過份。
還未有第三個人換完衫，他倆兄妹己經跳落水中嬉戲。
在看台上，由方溫仔和方溫妹組成的啦啦隊，己經唱住不同明星既番版歌作為打氣！
十五分鐘的熱身時間過了，小鳳姐和水龍頭便去救傷站休息。
由於他們參加多項賽事，他們不想去看台和更衣室，
便坐在救傷站，還有一個可愛的俏護士小雲照顧。
在泳池的區域內還有小鬼同邪童，在起點指黎指去，深資童軍0禾！
飛貓、宙斯同棋王就不知用了什麼手段，三唔識七話幫校報果班人影相！
果三個人專影人上水個衰樣、一唔係就影女仔。
還有兩隻馬路少年團張小強和倪君傑在泳池門口做門口汪汪，但不斷放他們的朋友進出。
上午係個人項目，水龍頭和小鳳姐各獲得五金、雷公亦得兩銀。
一企齊等食飯時，小雲笑住說：『我贏了，我有三百個一毫子！』
各人十分驚訝地望住小雲，小雲再說：『去食雲吞王！』
去到雲吞王後，餐牌都冇望，每人己叫了一碗或一碟雲吞河或麵。
除了小雲外各人都不大喜歡這兒，因為雲吞王只有雲吞！
兒歌馨忍不住問：『你成日都在救傷站陪小鳳姐和水龍頭，你點唱錢？』
『我叫我既同我幫我唱，自己班都未問完己經久喇！』小雲風騷地說。
『我本來都有，但係口渴，買左杯汽水！得二百六十個！』雪碧說。
『我輸了，我得一百個唔夠！』小鬼說。
『點解丫，你都好差0禾！』兒歌馨問。
小鬼望一望邪童冇出聲。
『小鬼，我陪你！我得一百一十個！』宙斯冇耐地說。
各人報完數後，棋王以二百一十五個勝了飛貓二百個。
飛貓不忿地說：『你地個個都可以用得少過十蚊架！』

食完雲吞後，各人也不飽，去了食水果食品店–花果山。
大部份人也叫了花果山的成名作–花果山香焦西米撈，只有雪碧叫了杯雪西瓜（雪碧加西瓜汁）。
食食下香焦西米撈，程景濤和他的同學仔都黎食，但程景濤見雷公在這兒，便變了買外賣。
在等外賣其間，只有風鈴和宙斯淡淡地和程景濤交談。而程景濤拎完外賣後便匆匆走了。
『以後我地要大日子先可以一齊食飯喇，水龍頭同小鳳姐成日要帶隊出賽、
學生會副主席宙斯要在學校食飯。小雲、小鬼同邪童久唔久就要在學校當值。
我地個個都係校隊，久唔久就出賽。以後每次在流亦思都係得幾丁友！』風鈴冇耐地說。
『下年我地中五，學校唔比我地再擔任任何一職，未可以一齊食飯啦！』棋王說。
『你唔記得我係旅行社會長嗎？我們可以在星期六旅行嘛！』水龍頭輕拍風鈴的頭。
大家食完焦撈同西汁後，便去『擔屎』商場行公司。
行公司期間，看見張小強和倪君傑迎面而來，水龍頭等人各報以輕視的眼光。
『你地多人我地就驚0架喇！慳少少啦唔該。』張小強說。
『成年守門口啦，門口汪汪頭！』小鬼說。佢真係有權，因為佢係制服及紀律聯會主席嘛。

下午的水運會比賽是各項的接力比賽、友校接力比賽和頒獎時間。
各項目飛快地過，水龍頭和小鳳姐游完自己的接力後，便招呼參家友校接力的練水朋友仔。
今年的大贏家又是水龍頭、小鳳姐同黃社，各人開心之餘，便帶著開心的心情回家。
在回程途中，雪碧拉水龍頭一邊說：『可唔可以比左你個獎杯我丫？』『貪心！冇丫！』水龍頭笑說。

次日清晨，水龍頭比平時早十五分鐘去到雪碧樓下，更上樓在她門口等她。
雪碧一開門見水龍頭在門口，對他傻笑了一笑。
因為怕屋內人聽到他說話，水龍頭輕聲說：『送比你0架！』
水龍頭將他昨天贏得的獎杯送給雪碧，雪碧開心地拎入房。

在斷腸崖，雪碧邊吃豬腸粉邊說：『你又話唔比人既？』
『我都要拎番屋企比阿爸阿媽睇過先得架！』水龍頭邊吃豬腸粉邊說。
『今日默書，你讀左未？』雪碧真切地問。
『你又知我今日默書？』水龍頭有點驚丫。
『成級一齊默丫嘛，你唔見你個妹溫書咩？』雪碧說。
『冇咩留意！不過我稔佢應該溫得好熟，我成晚都冇見過佢！』水龍頭開始抹嘴。
『你冇出房0者！』雪碧搶了水龍頭用了一半的紙巾抹嘴。

水龍頭點完名後，唔知點解要去廁所。
在回程時經過小鳳姐班房，成班正在默書，水龍頭更見到倪君傑在出貓！
上完兩堂後，棋王和水龍頭在食物部食野，見倪君傑比左張貓紙張小強。
『哇！乜連貓紙到慳丫！』棋王對水龍頭說。
『你有冇讀書？』水龍頭問棋王。
『有丫，實一百分！』棋王說。
『甘玩佢一獲啦！』水龍頭笑說。
在第二個小息時，棋王和水龍頭等張小強和倪君傑去食煙時，便扮去廁所。
『你張貓紙甘大，唔驚比人睇到咩？』棋王大大聲問。
『你果張咩仲大張！』水龍頭大大聲講。
『驚睇唔到丫！我稔住放係筆盒下面，我都係！』大大聲講完便離開廁所。

在默書期間，水龍頭和棋王更扮緊張同東張西望。
而張小強好快甘出完貓，便舉手舉報棋王和水龍頭出貓。
中文老師禿鷹便大叫：『棋王和水龍頭你兩個舉高雙手！』
張小強很快便行到棋王和水龍頭前面，拎起佢地既筆盒，果然有兩張貓紙。
『你地三個跟我去見校長。』禿鷹冷漠地說。

在壹號房內，校長見事態嚴重，放下手上的工作，開始盤問。
『你地兩個默書出貓丫？』校長不信地問。
『冇丫，我地唔記得收埋張紙0乍！』水龍頭口震震地說。
『你又點發覺佢地出貓呢？』校長問張小強。
『佢地小息時在廁所講既，默書果真又鬼鬼鼠鼠甘。』張小強說。
『我地識架，唔通要再默一次比你睇咩！』棋王說。
『好丫，你地默一次啦！』校長說。
棋王和水龍頭扮驚互望了一望，便開始默。
默完後，禿鷹說：『佢地真係識，全對！』
『張小強，我就小息果陣見倪君傑交張貓紙比你，你又識唔識丫？』棋王問。
『我今朝行過倪君傑班房時，我都見倪君傑在出貓。』水龍頭說。
『張小強，你現在開始默。李星龍、王棋，你幫我叫倪君傑落黎，然後番班房啦！』校長說。
『下次，唔好放紙係檯面喇！』禿鷹說。
棋王和水龍頭叫了倪君傑去壹號房後，便開開心心回班房、等食飯同報喜！

-待續-

Posted by 文盲 on April 22, 1998 at 18:22:08:

人們常在事情未發生前做很多很多的預備，但事情發生每每在瞬間！
事情突然發生，人們要在預備不足的情況下作出反應，在情緒的煽動下，
人往往表現衝動的一面。

衝動時常被人形容得很負面，是否真的如此。衝動的人，往往不會想
太多便作出反應、行動。而這一刻的力量，不知什麼原因，大得令人有點
不可相信！這龐大的動力，來自一個直覺。直覺是情緒、感覺、經驗、道
德、信心等加起來的表現，沒有理性的考慮，是人很真實的一面。

一個情緒不穩定、感覺差、冇經驗、冇道德、但有信心的人衝動起來
效果通常很負面。相反一個情緒穩定、感覺好、有經驗、道德高尚、信心
十足的人衝動起來效果通常很大快人心，有時甚至很可愛。

還有另外一種人，有事情發生，是不會作出反應，他會細心看事情的
發展，之後再作出反應。這些人不是反應遲鈍，而是經驗所得，看了事情
發展後，事情會變得容易處理。不要認為人可以在短時間內成長，不過這
些時間可以令人冷靜、令人變得理性。

無可否認理性是一種好有效的對事方針，甚至會係成功的因數。理性
的人做事是可靠的、令人放心。但物極必反，一個過份理性的人，會變得
冇情、冷酷，有些人更會變得過份計較。

衝動、理性也是人面對愛情的方法。衝動是浪漫愛情的因數；理性是
良好關係的楷梯。有冇試過問自己，鍾意戀愛的浪漫感覺還是鍾意良好的
親密關係？